प्रदेश ३

सिन्धुपाल्चोक बस दुर्घटना: मृतक सबैको सनाखत

दोलखाको कालिञ्चोकबाट भक्तपुर जाँदै गरेको बा ४ ख ४४६८ नम्बरको यात्रुबस सुनकोसी गाउँपालिका वडा ७ को छ किलो मोडबाट खस्दा मृत्यु हुनेको संख्या १५ पुगेको छ ।

आइतबार बिहान लामोसाघु जिरी सडकखण्डअन्तर्गतको ६ किलोबाट ५ किलोको सडकमै खस्दा घटनास्थलमै १२ को मृत्यु भएको हो । प्रहरीका अनुसार मृत्यु हुनेमा ८ महिला, ३ पुरुष, २ बालक र एक बालिका रहेका छन् । मृतकमध्ये १४ जनाको सनाखत भएको छ । एक महिलाको नाम खुलेको छैन ।

दुर्घटनामा दोलखा जिल्ला भिमेश्वर नगरपालिका–९ की ४२ वर्षीया लक्ष्मी श्रेष्ठ, रामेछाप उमाकुण्ड गाउँपालिका–४ प्रितीका २४ वर्षीय महेश तामाङ, काभ्रे बेथानचोक–५ का ३५ वर्षीय रामशरण खत्री र सोही स्थानकी उनकी श्रीमती ३५ वर्षीया मैया खत्री, लिसंखुपाखर गाउँपालिका–४ की ५३ वर्षीया गंगामाया लामा, जुगल गाउँपालिका–७ याङलकोटकी ७ वर्षीया सविना तामाङ, सोही ठाउँकी ३० वर्षीया रेश्मा तामाङ, १५ महिनाकी रोशनी तामाङको मृत्यु भएको प्रहरीले जनाएको छ ।

त्यस्तै बलेफी गाउँपालिका–५ चिम्लिङ की ३७ वर्षीया फुलमाया तामाङ र दोलखा शैलुङश्वरी गाउँपालिका फस्कुका १० वर्षीया रञ्जित बस्नेत, रामेछाप सुनपाती ६ की जुनमाया तामाङ, मञ्जु तामाङ, सुकबहादुर तामाङ, र भत्तपुर सुर्यविनायक ८ की ३८ वर्षीया चिनु बस्नेतको मृत्यु भएको इलाका प्रहरी कार्यालय बाह्रविसेका प्रहरी इन्सपेक्टर नवराज न्यौपानेले जानकारी दिए । अन्दाजी २४ वर्षीया एक महिलाको सनाखत हुन बाँकी रहेको उनले बताए ।

‘घाइतेको काभ्रेको धुलिखेल अस्पताल र खाडीचौरस्थित सिन्धुसदाबहार अस्पतालमा लगिएको छ । ३ जनाको अवस्था गम्भीर रहेको इलाका प्रहरी बाह्रबिसेका प्रहरी निरीक्षक नवराज न्यौपानेले जानकारी दिएका हुन् । बस सडकबाट एकसय मिटर तल खसेको थियो ।

दोलखाको कालिन्चोक घुमेर फर्किएका भक्तपुर च्यामासिह, काभ्रे र सिन्धुपाल्चोक ,जलविरे याङलाकोटजस्ता विभिन्न स्थानमा ३५ भन्दाबढी यात्रु बसमा सवार थिए । गाडीको ब्रेक फेल भएको थियो । चालक फरार रहेको जनाइएको छ ।

Related Articles

Close